Fdzfgy

Gunvor Ulstein
Fødd	11. juni 1969 Ulstein
Yrke	forretningsdrivande

Gunvor Ulstein (fødd 11. juni 1969) er ein norsk industrileiar, konsernsjef i Ulstein Group og administrerande direktør i Ulstein Shipping.
Gunvor Ulstein er dotter av konsernet sin tidlegare konsernsjef, Idar Ulstein (1934-2012). Ho er utdanna siviløkonom frå Norges Handelshøyskole, og har 1. avdeling jus frå Universitetet i Bergen.

Karriere |

I 1993-1994 var ho trainee ved Columbia Shipmanagement på Kypros, arbeidde som marknadsanalytikar 1994-1997, og ved motorfabrikken Ulstein Bergen var ho deretter salssjef (1997-1999). Ho vart tilsett som administrerande direktør for Ulstein Verft i mars 1999, etter at Brynjulv Mugaas gjekk til Fred. Olsen. Broren Tore Ulstein var då teknisk direktør same stad, og dei var begge medeigarar. I 2003 vart ho konsernsjef. Gunvor Ulstein er også øvste leiar i dotterselskapet Ulstein Shipping. I tillegg er ho eineeigar og leiar av selskapet Mogul Invest som er medeigar i Ulsmo AS^[1], som igjen er største eigar av Ulstein Group.

Gunvor Ulstein er styreleiar i Ulstein Verft AS, Ulstein Design & Solutions AS, Ulstein Verft Eiendom, Vanylven Eiendom, Ulstein International, Ulstein Marine Services, Ulstein Trading og Ulsmo AS.
Ho er styreleiar i Hafast (Hareid Fastlandssamband AS), som arbeider for eit ferjefritt samband mellom Hareid og Ålesund via Sula, medlem i NHH sitt Advisory Board, SOS Barnebyers Råd og Nor-Shipping Advisory Board.

Av tidlegare verv har ho mellom anna vore nestleiar[1] i styret for NRK, nestleiar i Rådet i Det Norske Veritas (DNV), medlem av nærings- og handelsministeren sitt Råd for Maritim Utvikling (MARUT), medlem av representantskapet for Norges Bank, styremedlem i Eksportfinans (2003–2007), medlem av hovudstyret i Teknologibedriftenes Landsforening (no Norsk Industri), og nestleiar i styret i NHO Møre og Romsdal.

Utmerkingar |

Gunvor Ulstein har motteke fleire utmerkingar. I 2006 vart ho utnemnt til Årets Forretningskvinne^[2] av sjampanjehuset Veuve Clicquot, og i 2008 fekk ho WISTA-prisen^[3] som Årets Shippingnamn. I 2011 fekk ho prisen Seatrade Young Person in Shipping^[4]. I 2013 mottok ho Tekna sin gullmedalje^[5] for «framståande innsats i å skapa nye moglegheiter for norsk teknologi.»

Kjelder |

Fotnotar |