Fdzfgy

Stavangerflint AS var ein fabrikk for tilverking av flintgods som låg i Hillevåg i Stavanger. Produksjonen starta i 1949 og vart nedlagt i 1979.

Selskapet vart stifta allereie i 1946 og dei bygde ein heilt ny stor fabrikk i Hillevåg. I byrjinga heitte verksemda Stavanger Fajansefabrikk AS, men allereie tidleg på 50-talet endra dei namn til Stavangerflint AS.

Utover 50- og 60-talet var det ein livleg produksjon av servise og pynteartiklar som vasar, skåler, veggfat og mykje anna. Rett etter krigen var det ein voldsom trong her i landet for billige kvardagsservise, og den marknaden kasta både Stavangerflint og den hardaste konkurrenten, Figgjo Fajanse, seg over. Då den verste innanlandske trongen var stetta byrja dei etterkvart å sjå ut over landets grenser etter nye marknadar. På midten av 60-talet eksporterte Stavangerflint varene sine til ikkje mindre enn 24 land, mellom anna Storbritannia, USA, Canada, Danmark og Sverige, men den viktigaste marknaden var nok framleis i Noreg.

Stavangerflint AS fusjonerte med Figgjo Fajanse AS i 1968. Det vart dreve produksjon vidare i begge fabrikkane utover 1970-talet, men frå 1978 vart maskiner og tilsette gradvis flytta til Figgjo. Mange av dei tilsette takka nei til å byrja ved Figgjo, og fekk seg i staden nytt arbeid i Stavanger. I 1979 vart det heilt slutt på verksemda ved Stavangerflint.

Mellom dei kunstnarlege medarbeidarane var:

• Kåre Berven Fjeldsaa


• Vigdis Gløersen


• Gro Karlsen


• Anne Lofthus


• Kari Nyquist


• Carl Olaf Olsen


• Eystein Sandnes


• Inger Waage


• Kai Fjell